വനിതാ ടി20 ചലഞ്ചിൽ റോയൽ ചലഞ്ചേഴ്സ് ബാംഗ്ലൂരിനെ (ആർസിബി) നയിക്കാൻ ഒരുങ്ങുന്ന ഇന്ത്യൻ വനിതാ ക്രിക്കറ്റ് ടീം ഓപ്പണർ സ്മൃതി മന്ദാന, തന്നെ വിരാട് കോഹ്ലിയുമായി താരതമ്യപ്പെടുത്തുന്നത് തനിക്ക് ഇഷ്ടമല്ലെന്ന് പറഞ്ഞു. അദ്ദേഹം തന്നെക്കാൾ ഏറെ ഇന്ത്യൻ ടീമിനായും ക്രിക്കറ്റിലും സാധിച്ചിട്ടുള്ള ആളാണെന്നും സ്മൃതി പറഞ്ഞു
മന്ദാനയും കോഹ്ലിയും ഇന്ത്യയുടെയും ആർസിബിയുടെയും ജേഴ്സി നമ്പറായി 18-ാം നമ്പർ ആണ് അണിയുന്നത്. “എനിക്ക് ഇത്തരത്തിലുള്ള താരതമ്യം ഇഷ്ടമല്ല, കാരണം കോഹ്ലിയുടെ നേട്ടങ്ങൾ അതിശയകരമാണ്. ഞാൻ ആ നിലയിലെത്തുമെന്ന് ഞാൻ ആഗ്രഹിക്കുന്നു, പക്ഷേ ഇപ്പോൾ ഞാൻ അടുത്തെങ്ങും ഇല്ല. ഈ ഫ്രാഞ്ചൈസിക്ക് (ആർസിബി) വേണ്ടി അദ്ദേഹം നേടിയത് ഞാൻ ചെയ്യാൻ ശ്രമിക്കും” മന്ദാന മുംബൈയിൽ മാധ്യമപ്രവർത്തകരോട് പറഞ്ഞു.
“വനിതാ പ്രീമിയർ ലീഗിനൊപ്പം, വനിതാ ക്രിക്കറ്റിന് ഇതൊരു അത്ഭുതകരമായ സമയമാണെന്ന് ഞാൻ കരുതുന്നു. ഇന്ത്യയിൽ വനിതാ ക്രിക്കറ്റിനെ ആളുകൾ എങ്ങനെയാണ് അംഗീകരിക്കുന്നത് എന്ന് നിങ്ങൾക്ക് എല്ലായിടത്തും കാണാൻ കഴിയും. 16 വയസ്സ് മുതൽ ഞാൻ ആഭ്യന്തര ടീമുകളെ നയിച്ചിട്ടുണ്ട്, ഞാൻ മഹാരാഷ്ട്ര ടീമിനെ നയിച്ചിട്ടുണ്ട്. ഒപ്പം ചലഞ്ചേഴ്സ് ട്രോഫിയിലും. ക്യാപ്റ്റൻ എന്നത് എനിക്ക് അത്ര പുതുമയുള്ള കാര്യമല്ല.” മന്ദാന പറഞ്ഞു.
മാർച്ച് അഞ്ചിന് ബ്രാബോൺ സ്റ്റേഡിയത്തിൽ ഡൽഹി ക്യാപിറ്റൽസിനെതിരെയുള്ള മത്സരത്തോടെ ആർസിബിയുടെ സീസൺ ആരംഭിക്കും.