ഐപിഎൽ മെഗാ ലേലത്തിന് മുമ്പുള്ള ചുരുക്ക പട്ടിക പുറത്ത് വിട്ട് ബിസിസിഐ. 1214 താരങ്ങള്‍ ലേലത്തിന് രജിസ്റ്റര്‍ ചെയ്തതിൽ നിന്ന് 590 പേരെയാണ് മെഗാ ലേലത്തിനായി ഫ്രാഞ്ചൈസികള്‍ തിരഞ്ഞെടുത്തിരിക്കുന്നത്. ഫെബ്രുവരി 12, 13 തീയ്യതികളില്‍ നടക്കാനിരിക്കുന്ന ലേലത്തിൽ ജോഫ്ര ആര്‍ച്ചര്‍ പേര് നല്‍കിയിട്ടുണ്ട്. താരം എന്നാൽ 2023 സീസണിൽ മാത്രമേ തിരികെ കളത്തിലേക്ക് എത്തുകയുള്ളു. ജോഫ്രയ്ക്ക് 2 കോടിയുടെ അടിസ്ഥാന വിലയാണുള്ളത്.
ഇക്കാര്യം ഫ്രാഞ്ചൈസികളോട് ബിസിസിഐ അറിയിച്ചിട്ടുണ്ട്. മലയാളി താരം ശ്രീശാന്തും 590 പേരുടെ ചുരുക്കപ്പട്ടികയിൽ ഇടം പിടിച്ചിട്ടുണ്ട്. ശ്രീശാന്തിന് 50 ലക്ഷം രൂപയാണ് അടിസ്ഥാന വില. 44 പുതിയ താരങ്ങളെ ലേലത്തിൽ ചേര്‍ത്തിട്ടുണ്ടെന്ന് ബിസിസിഐ അറിയിച്ചു.
ജോഫ്രയ്ക്ക് പുറമെ ഉസ്മാന്‍ ഖവാജയാണ് അത്തരത്തിലുള്ള ഈ പട്ടികയിൽ ഇടം പിടിച്ച താരം. 44 പേരിൽ 11 പേര് ഇന്ത്യയിൽ നിന്നും ആറ് പേര് ന്യൂസിലാണ്ടിൽ നിന്നും അഞ്ച് പേര് ഓസ്ട്രേലിയയിൽ നിന്നുമാണ്. നാല് പേര് വീതം ശ്രീലങ്ക, വെസ്റ്റിന്‍ഡീസ് എന്നിവിടങ്ങളില്‍ നിന്നും ദക്ഷിണാഫ്രിക്കയിൽ നിന്ന് 7 പേരുമുണ്ട്.
ക്രിസ് ഗെയിൽ ഈ വര്‍ഷം ഐപിഎലില്‍ കളിക്കില്ലെന്ന് തീരുമാനിച്ചിട്ടുണ്ട്. ബെന്‍ സ്റ്റോക്സ്, മിച്ചൽ സ്റ്റാര്‍ക്ക് എന്നിവരാണ് ഈ വര്‍ഷം ലേലത്തിനില്ലാത്ത മറ്റു രണ്ട് പ്രമുഖ താരങ്ങള്‍.
