ഇന്ത്യയും പാകിസ്താനും തമ്മിലുള്ള ക്രിക്കറ്റ് ചർച്ചകളും രാഷ്ട്രീയമാവുകയാണ്. കഴിഞ്ഞ ദിവസം പി സി ബി ചെയർമാൻ സേതി എന്തിനാണ് ഇന്ത്യ പാകിസ്ഥാനിലേക്ക് പോകാൻ ഭയപ്പെടുന്നത് എന്ന് ചോദിച്ചിരുന്നു. ഇന്ന് ഇപ്പോൾ ആ ചോദ്യത്തിന് മറുപടിയുമായി ഹർഭജൻ സിംഗ് രംഗത്ത് എത്തിയിരിക്കുകയാണ്.
ഏഷ്യൻ കപ്പിനായി ഇന്ത്യ പാകിസ്ഥാനിലേക്ക് പോയില്ല എങ്കിൽ പാക്സിതാൻ ലോകകപ്പിനായി ഇന്ത്യയിലേക്കും വരില്ല എന്ന് ചർച്ചകൾ ഉയരുന്ന സാഹചര്യത്തിൽ ആണ് പ്രതികരണങ്ങൾ. ANI-യോട് സംസാരിക്കവേ, ഇന്ത്യ പാകിസ്ഥാനിലേക്ക് പോകേണ്ടതില്ല എന്ന് 42കാരനായ ക്രിക്കറ്റ് താരം പറഞ്ഞു. പാകിസ്താന് ഇന്ത്യയിലേക്ക് യാത്ര ചെയ്യണമെങ്കിൽ ചെയ്യാം എന്നും അവർ വരുന്നില്ല എങ്കിൽ ഇന്ത്യ അത് കാര്യമാക്കില്ലെന്നും അദ്ദേഹം പറഞ്ഞു.
“ഇന്ത്യ പാകിസ്ഥാനിലേക്ക് പോകരുത്, അവിടെ സുരക്ഷിതമല്ല, അവരുടെ രാജ്യത്ത് ഉള്ള ആളുകൾക്ക് അവരുടെ രാജ്യത്ത് സുരക്ഷിതത്വം തോന്നുന്നില്ലെങ്കിൽ ഞങ്ങൾ എന്തിനാണ് പിന്നെ അവിടേക്ക് യാത്ര ചെയ്യാൻ ശ്രമിക്കുന്നത്?” ഹർഭജൻ പറഞ്ഞു. “അവർ വരാൻ ആഗ്രഹിക്കുന്നുവെങ്കിൽ വരട്ടെ, അവർ വരാൻ ആഗ്രഹിക്കുന്നില്ലെങ്കിൽ ഞങ്ങൾക്ക് അത് പ്രശ്നമല്ല. ഒരുപക്ഷേ പാകിസ്ഥാൻ ക്രിക്കറ്റിന് ഇന്ത്യയെ ആവശ്യമായിരിക്കാം, പക്ഷേ അവരെ ഞങ്ങൾക്ക് ആവശ്യമില്ല” ഹർഭജൻ എഎൻഐയോട് പറഞ്ഞു