നെതര്ലാണ്ട്സിനെതിരെയുള്ള ത്രില്ലര് മത്സരത്തിൽ തോൽവിയുടെ പക്ഷത്തായതോടെ ലോകകപ്പ് യോഗ്യതയിൽ വെസ്റ്റിന്ഡീസിന് കാര്യങ്ങള് പ്രയാസകരമാണ്. ടീം സൂപ്പര് സിക്സിലേക്ക് യോഗ്യത നേടിയെങ്കിലും നെതര്ലാണ്ട്സിനോടുള്ള തോൽവി ടീമിന്റെ സാധ്യതകളെ പ്രതികൂലമായി ബാധിച്ചിരിക്കുകയാണ്.
രണ്ട് ടീമുകള് മാത്രം ലോകകപ്പിന് യോഗ്യത നേടുമ്പോള് വെസ്റ്റിന്ഡീസിനെക്കാള് പോയിന്റുമായി സിംബാബ്വേ(8 പോയിന്റ്), ശ്രീലങ്ക, സ്കോട്ലാന്ഡ്, നെതര്ലാണ്ട്സ് എന്നിവര് ആറ് പോയിന്റുമായാണ് സൂപ്പര് സിക്സിലേക്ക് യോഗ്യത നേടിയിട്ടുള്ളത്. ഒമാനും വെസ്റ്റിന്ഡീസും 4 പോയിന്റ് നേടിയിട്ടുണ്ട്.
ചിലപ്പോള് ടീം അടിത്തട്ടിലെത്തി നിൽക്കുമ്പോള് മാത്രമാകും തിരിച്ചുവരവിന് പ്രചോദനം ഉണ്ടാകുകയെന്നും ശ്രമകരമായ ദൗത്യമാണ് മുന്നിലുള്ളതെന്ന് അറിയാമെന്നുമാണ് വിന്ഡീസ് മുഖ്യ കോച്ച് ഡാരന് സാമി പറയുന്നത്. ഈ മാറ്റങ്ങള് രാത്രി ഇരുട്ടി വെളുക്കുമ്പോള് സംഭവിക്കില്ലെന്നും തനിക്കറിയാമെന്നും എന്നാൽ വെസ്റ്റിന്ഡീസ് ക്രിക്കറ്റിന്റെ യഥാര്ത്ഥ അവസ്ഥയുടെ പ്രതിബിംബം ആണ് ഇതെന്നും സാമി കൂട്ടിചേര്ത്തു.