ന്യൂ സീലാണ്ടർ ഓഫ് ഇയർ അവാർഡിന് നോമിനേഷൻ ചെയ്യപ്പെടാൻ സാധ്യത ഉണ്ടെന്ന വാർത്തകൾ വന്നതിന് പിന്നാലെ താൻ അത് അർഹിക്കുന്നില്ലെന്ന് പറഞ്ഞ് ഇംഗ്ലണ്ടിന്റെ ലോകകപ്പ് ഹീറോ ബെൻ സ്റ്റോക്സ്. തന്നെക്കാളും ആ അവാർഡ് അർഹിക്കുന്നത് ന്യൂസിലാൻഡ് താരം കെയ്ൻ വില്യംസൺ ആണെന്നും ബെൻ സ്റ്റോക്സ് പറഞ്ഞു. “തന്നെ അവാർഡിന് നിർദേശിച്ചതിൽ തനിക്ക് സന്തോഷം ഉണ്ട്. ഒരു ന്യൂ സിലാൻഡ് വംശജനായതിൽ തനിക്ക് അഭിമാനവുമുണ്ട്. എന്നാൽ താൻ ഈ അവാർഡിന് നിർദേശിക്കാൻ അർഹനല്ല. ന്യൂസിലാൻഡിനു വേണ്ടി ഒരുപാടു കാര്യങ്ങൾ ചെയ്ത ആളുകൾ ഈ അവാർഡ് അർഹിക്കുന്നുണ്ട്.” സ്റ്റോക്സ് പറഞ്ഞു.
ന്യൂസിലാൻഡിനെ ലോകകപ്പ് ഫൈനലിൽ എത്തിച്ച നായകൻ കെയ്ൻ വില്യംസൺ ആണ് ഈ അവാർഡ് അർഹിക്കുന്നതെന്നും വില്യംസൺ ഈ ടൂർണമെന്റിന്റെ താരമാണെന്നും പ്രചോദനാത്മക നേതാവായ വില്യംസൺ ഈ അവാർഡ് അർഹിക്കുന്നുണ്ടെന്നും സ്റ്റോക്സ് പറഞ്ഞു. ന്യൂ സിലാണ്ടിലെ ക്രൈസ്റ്റ് ചർച്ചിൽ ജനിച്ച ബെൻ സ്റ്റോക്സ് തന്റെ 12മത്തെ വയസ്സിൽ ഇംഗ്ലണ്ടിലേക്ക് കൂടിയേറുകയായിരുന്നു.