ബേ ഓവൽ ടെസ്റ്റിൽ ചരിത്ര വിജയവുമായി ബംഗ്ലാദേശ്. ഇന്ന് മത്സരത്തിന്റെ അവസാന ദിവസം ന്യൂസിലാണ്ടിനെ രണ്ടാം ഇന്നിംഗ്സിൽ വെറും 169 റൺസിന് ഓള്ഔട്ട് ആക്കിയ ശേഷം 42/2 എന്ന സ്കോര് നേടി 8 വിക്കറ്റ് വിജയം ആണ് ബംഗ്ലാദേശ് നേടിയത്. 40 റൺസായിരുന്നു ബംഗ്ലാദേശിന്റെ വിജയ ലക്ഷ്യം. കഴിഞ്ഞ പതിനൊന്ന് വർഷത്തിനിടെ ന്യൂസിലാൻഡ് മണ്ണിൽ വിജയം നേടുന്ന ആദ്യത്തെ ഏഷ്യൻ ടീമായി മാറിയിരിക്കുകയാണ് ബംഗ്ലാദേശ്. ബംഗ്ലാദേശിന്റെ ടെസ്റ്റ് ചരിത്രത്തിൽ ആദ്യമായാണ് ന്യൂസിലൻഡിനെ പരാജയപ്പെടുത്തുന്നതും.
2011 ജനുവരിയിൽ പാകിസ്ഥാനോട് ഏറ്റ തോൽവിക്ക് ശേഷം ഒരു ഏഷ്യൻ ടീമിനോട് പോലും ന്യൂസിലാൻഡ് ടെസ്റ്റിൽ പരാജയം ഏറ്റുവാങ്ങിയിരുന്നില്ല. ഈ മികച്ച റെക്കോർഡ് ആണ് ബംഗ്ലാദേശ് ഇന്ന് തിരുത്തിയത്. 19 മത്സരങ്ങൾക്ക് ശേഷമാണ് ന്യൂസിലാൻഡ് ഒരു തോൽവി ഏറ്റുവാങ്ങിയത്.
2011ലെ പാകിസ്ഥാനോടുള്ള തോൽവിക്ക് ശേഷം ശ്രീലങ്കയോട് ആറു മത്സരങ്ങൾ, പാക്സിതാനോട് അഞ്ച്, ഇന്ത്യ, ബംഗ്ലാദേശ് എന്നീ ടീമുകളോട് നാല് മത്സരങ്ങൾ വീതം കളിച്ചിരുന്നു എങ്കിലും ഒരു മത്സരം പോലും ന്യൂസിലാൻഡ് പരാജയപ്പെട്ടിരുന്നില്ല.