ഇന്ത്യ ലോക ടെസ്റ്റ് ചാമ്പ്യൻഷിപ്പ് ഫൈനലിൽ ആദ്യ ഇലവനിൽ നിന്ന് അശ്വിനെ ഒഴിവാക്കിയതിനനെ വിമർശിച്ച് മുൻ ഓസ്ട്രേലിയൻ ക്യാപ്റ്റൻ റിക്കി പോണ്ടിംഗ്. ഇന്ത്യ തങ്ങളുടെ പ്ലെയിംഗ് ഇലവനെ ആദ്യ ഇന്നിംഗ്സിനായി മാത്രമാണ് തിരഞ്ഞെടുത്തത് എന്നും പോണ്ടിംഗ് പറഞ്ഞു. ഇന്ന് ഇന്ത്യ അശ്വിനെ ഉൾപ്പെടുത്താതെ ജഡേജ എന്ന ഒരൊറ്റ സ്പിന്നറുമായാണ് ഇറങ്ങിയത്.
“അശ്വിനെ ടീമിലെടുക്കാത്തതിൽ ഇന്ത്യയ്ക്ക് തെറ്റ് പറ്റി. ആദ്യ ഇന്നിംഗ്സിനെ കുറിച്ച് മാത്രമാണ് അവർ ചിന്തിക്കുന്നത്. രവീന്ദ്ര ജഡേജയേക്കാൾ ഇടംകൈയ്യൻമാരെ അശ്വിൻ ബുദ്ധിമുട്ടിക്കുമായിരുന്നു.” സ്റ്റാർ സ്പോർട്സിൽ പോണ്ടിംഗ് പറഞ്ഞു.
“ഇപ്പോൾ അവർ ടോസ് നേടി ബൗൾ ചെയ്തതിനാൽ, പുതിയ പന്തിൽ കുറച്ച് ആഘാതം ഓസ്ട്രേലിയക്ക് മേൽ വരുത്താൻ ആകും എന്നാണ് ഇന്ത്യ കരുതിയത്. എന്നാൽ കളി തുടരുമ്പോൾ, അത് മാറുമെന്ന് ഞാൻ കരുതുന്നു, ഓസ്ട്രേലിയൻ ഇടംകൈയ്യൻമാർക്ക് എതിരെ അശ്വിൻ ബൗൾ ചെയ്യണമായിരുന്നു” പോണ്ടിംഗ് ചാനൽ 7-ൽ പറഞ്ഞു.
ഇന്ന് ആദ്യ ദിവസം അവസാനിച്ചപ്പോൾ ഓസ്ട്രേലിയ 327-3 എന്ന ശക്തമായ നിലയിലാണ്.