രണ്ടാം ആഷസ് ടെസ്റ്റ് ആവേശകരമായ അന്ത്യത്തിലേക്ക്. അവസാന ദിവസം കളി ലഞ്ചിന് പിരിയുമ്പോൾ ഇംഗ്ലണ്ട് 243/6 എന്ന നിലയിൽ ബാറ്റിംഗ് തുടരുകയാണ്. ഇനി വിജയിക്കാൻ ഇംഗ്ലണ്ടിന് 128 റൺസ് കൂടെയാണ് വേണ്ടത്. ഓസ്ട്രേലിയക്ക് വിജയിക്കാൻ 4 വിക്കറ്റും. ക്യാപ്റ്റൻ സ്റ്റോക്സിന്റെ ബാറ്റിംഗ് ആണ് ഇംഗ്ലണ്ടിന് പ്രതീക്ഷ നൽകുന്നത്.
ഇന്ന് ആക്രമിച്ചു കളിച്ച സ്റ്റോക്സ് 147 പന്തിൽ 108 റൺസുമായി നിൽക്കുകയാണ്. ഇന്ന് 114/4 എന്ന നിലയിൽ ആയിരുന്നു ഇംഗ്ലണ്ട് കളി പുനരാരംഭിച്ചത്. 83 റൺസ് എടുത്ത ഡക്കറ്റിനെയും 10 റൺസ് എടുത്ത ബെയർസ്റ്റോയെയും ആദ്യ സെഷനിൽ ഇംഗ്ലണ്ടിന് നഷ്ടമായി. ഇതിനു പിന്നാലെയാണ് സ്റ്റോക്സ് ആക്രമിച്ചു കളിക്കാൻ തുടങ്ങിയത്.
കാമറൂൺ ഗ്രീനിന്റെ ഒരു ഓവറിൽ 3 സിക്സ് അടക്കം 26 റൺസ് സ്റ്റോക്സ് അടിച്ചു കൂട്ടി. സ്റ്റോക്സിന്റെ ഇന്നിങ്സിൽ 4 സിക്സും 9 ഫോറും ഉൾപ്പെടുന്നു. സ്റ്റോക്സിന് ഒപ്പം 1 റണ്ണുമായി ബ്രോഡ് ക്രീസിൽ ഉണ്ട്.