ഇംഗ്ലണ്ടിനെതിരെ മൂന്നാം ഏകദിനത്തില് ഇന്ന് മുഹമ്മദ് അമീര് കളിയ്ക്കില്ല. താരത്തിനു ചിക്കന്പോക്സ് പിടിപെട്ടുവെന്ന് സംശയിക്കുന്നതിനാലാണ് ഇത്. ഇതോടെ താരത്തിനു ലോകകപ്പിനുള്ള ടീമിലേക്കുള്ള തന്റെ സാധ്യതകള്ക്കായി മികച്ച പ്രകടനം പുറത്തെടുക്കുവാനുള്ള അവസരം കൂടിയാണ് നഷ്ടമായിരിക്കുന്നത്.
താരം നിലവില് ടീമിനൊപ്പം യാത്ര ചെയ്യാതെ ലണ്ടിനില് തന്റെ കുടുംബത്തോടൊപ്പം താമസിക്കുകയാണ്. ആദ്യ മത്സരം ഉപേക്ഷിക്കപ്പെട്ടപ്പോള് സൗത്താംപ്ടണിലെ രണ്ടാം മത്സരത്തില് അസുഖം മൂലം താരം കളിച്ചിരുന്നില്ല. ഇപ്പോള് ചിക്കന്പോക്സാണെന്ന് കണ്ടെത്തിയാല് ശേഷിക്കുന്ന മത്സരങ്ങളില് താരം കളിയ്ക്കുമോ എന്ന കാര്യവും സംശയത്തിലാണ്.
ലോകകപ്പിനുള്ള പ്രാഥമിക സ്ക്വാഡില് നിന്ന് താരത്തെ പാക്കിസ്ഥാന് ഒഴിവാക്കിയിരുന്നു. എന്നാല് ഇംഗ്ലണ്ട് പര്യടനത്തിനുള്ള 17 അംഗ സംഘത്തില് താരത്തെ ഉള്പ്പെടുത്തി പാക്കിസ്ഥാന് ലോകകപ്പിനു മുമ്പ് താരത്തിനു ഒരവസരം കൂടി നല്കുകയായിരുന്നു. ഇപ്പോളത്തെ സ്ഥിതിയില് താരത്തിനു ഇനി മത്സരങ്ങളില് മികച്ച പ്രകടനം പുറത്തെടുക്കുവാനോ ലോകകപ്പ് ടീമിലേക്കുള്ള തന്റെ സാധ്യതകളെ സ്വാധീനിക്കുവാനോ സാധിക്കില്ല എന്നാണ് അറിയുവാന് കഴിയുന്നത്.