അഫ്ഗാനിസ്ഥാനും ബംഗ്ലാദേശും തമ്മിലുള്ള ആദ്യ ഏകദിനത്തിൽ അഫ്ഗാനിസ്ഥാന് വിജയം. മഴ നിയമത്തിൽ 17 റൺസിന്റെ വിജയം ആണ് അഫ്ഗാനിസ്ഥാന് നേടിയത്. ആദ്യം ബാറ്റ് ചെയ്ത ബംഗ്ലാദേശ് 43 ഓവറിൽ 169/9 എന്ന നിലയിൽ നിൽക്കുമ്പോളാണ് മഴ കളി തടസ്സപ്പെടുത്തുന്നത്.
പിന്നീട് അഫ്ഗാനിസ്ഥാന്റെ ലക്ഷ്യം 43 ഓവറിൽ 164 റൺസായി പുനക്രമീകരിച്ചു. ടീം 21.4 ഓവറിൽ 83/2 എന്ന നിലയില് നിൽക്കുമ്പോള് മഴ വീണ്ടും കളി തടസ്സപ്പെടുത്തി. അപ്പോള് അഫ്ഗാനിസ്ഥാന് 17 റൺസിന്റെ വിജയം മഴ നിയമത്തിൽ കുറിച്ചു.
ബംഗ്ലാദേശിന് വേണ്ടി 51 റൺസ് നേടിയ തൗഹിദ് ഹൃദോയ് മാത്രമാണ് റൺസ് കണ്ടെത്തിയത്. ഫസൽഹഖ് ഫറൂഖി 3 വിക്കറ്റും മുജീബ് ഉര് റഹ്മാന്, റഷീദ് ഖാന് രണ്ട് വിക്കറ്റ് വീതവും നേടിയാണ് ബംഗ്ലാദേശിനെ വരിഞ്ഞുകെട്ടിയത്.
ബാറ്റിംഗിൽ അഫ്ഗാനിസ്ഥാന് വേണ്ടി ഓപ്പണര്മാരായ റഹ്മാനുള്ള ഗുര്ബാസ്(22) – ഇബ്രാഹിം സദ്രാന് കൂട്ടുകെട്ട് 54 റൺസാണ് നേടിയത്. സദ്രാന് 41 റൺസുമായി പുറത്താകാതെ നിന്നു.