Author: Staff Reporter

സൗരാഷ്ട്രയുടെ ആദ്യ രണ്ട് രഞ്ജി ട്രോഫി മത്സരങ്ങൾക്കുള്ള ടീമിൽ ഇന്ത്യൻ ടെസ്റ്റ് താരം ചേതേശ്വർ പൂജാരയും. ഡിസംബർ 9ന് തുടങ്ങുന്ന സൗരാഷ്ട്രയുടെ 16 അംഗ രഞ്ജി ടീമിലാണ് പൂജാര ഇടം നേടിയത്. ഫാസ്റ്റ് ബൗളർ ജയദേവ് ഉനദ്കടാണ് സൗരാഷ്ട്ര ക്യാപ്റ്റൻ.

അടുത്ത രണ്ട് മാസത്തേക്ക് ഇന്ത്യക്ക് ടെസ്റ്റ് മത്സരങ്ങൾ ഒന്നും ഇല്ലാത്തതാണ് താരം രഞ്ജി ട്രോഫി കളിക്കാൻ കാരണം. അടുത്ത വർഷം ഫെബ്രുവരി അവസാനമാണ് ഇന്ത്യഇനി ടെസ്റ്റ് മത്സരങ്ങൾ കളിക്കുക. ന്യൂസിലാൻഡ് ആണ് ഇന്ത്യയുടെ എതിരാളികൾ. കഴിഞ്ഞ വർഷത്തെ റണ്ണേഴ്‌സ് അപ്പായ സൗരാഷ്ട്ര രഞ്ജി ട്രോഫി എലൈറ്റ് ഗ്രൂപ്പ് ബിയിലാണ്.

Team: Jaydev Unadkat (Captain), Cheteshwar Pujara, Sheldon Jackson, Arpit Vasavada, Dharmendrasinh Jadeja, Kamlesh Makwana, Snell Patel, Chirag Jani, Harvik Desai, Prerak Mankad, Avi Barot, Vishvaraj Jadeja, Kushang Patel, Chetan Sakariya, Divyaraj Chauhan and Jay Chauhan.

ഓസ്ട്രേലിയക്കെതിരെ പാകിസ്ഥാന് വേണ്ടി ടെസ്റ്റിൽ 16ആം വയസ്സിൽ അരങ്ങേറ്റം നടത്തിയ നസീം ഷാ അടുത്ത അണ്ടർ 19 ലോകകപ്പിൽ കളിക്കുമെന്ന് പരിശീലകൻ. പാകിസ്ഥാൻ യുവ ടീം പരിശീലകൻ ഇജാസ് അഹമ്മദാണ് നസീം ഷാ അടുത്ത മാസം ദക്ഷിണാഫ്രിക്കയിൽ വെച്ച് നടക്കുന്ന അണ്ടർ 19 ലോകകപ്പിൽ പാകിസ്ഥാന് വേണ്ടി കളിക്കുമെന്ന് പ്രഖ്യാപിച്ചത്.

സെലക്ടർമാരോടും പാകിസ്ഥാൻ ബൗളിംഗ് പരിശീലകൻ വാഖാർ യൂനിസിനോടും താരത്തെ അണ്ടർ 19 ലോകകപ്പിന് വേണ്ടി വിട്ടുതരണമെന്ന് ആവശ്യപ്പെട്ടിട്ടുണ്ടെന്ന് ഇജാസ് അഹമ്മദ് പറഞ്ഞു. ഓസ്‌ട്രേലിയക്കെതിരായ ഒന്നാം ക്രിക്കറ്റ് ടെസ്റ്റിൽ പാകിസ്ഥാന് വേണ്ടി അരങ്ങേറ്റം കുറിച്ച നസീം ഷാ മത്സരത്തിൽ ഒരു വിക്കറ്റും നേടിയിരുന്നു. എന്നാൽ ഓസ്‌ട്രേലിയക്കെതിരായ രണ്ടാമത്തെ ഡേ നൈറ്റ് ടെസ്റ്റിൽ താരത്തിന് അവസരം ലഭിച്ചിരുന്നില്ല.

ഓസ്ട്രേലിയൻ പിച്ചുകളിൽ നേടിയ റൺസുകൾ തനിക്ക് ആത്മവിശ്വാസം നൽകുമെന്ന് പാകിസ്ഥാൻ താരം ബാബർ അസം. ഓസ്‌ട്രേലിയക്കെതിരായ രണ്ട് ടെസ്റ്റ് മത്സരങ്ങളിൽ പാകിസ്ഥാൻ താരങ്ങൾ മികച്ച പ്രകടനം പുറത്തെടുക്കുന്നതിൽ പരാജയപ്പെട്ടപ്പോൾ ബാബർ അസം മികച്ച പ്രകടനം പുറത്തെടുത്തിരുന്നു. ഓസ്‌ട്രേലിയൻ നിരയിൽ മികച്ച ബൗളർമാർ ഉണ്ടെന്നും മിച്ചൽ സ്റ്റാർക്, പാറ്റ് കമ്മിൻസ്, ജോഷ് ഹസൽവുഡ് എന്നീ ബൗളർമാർക്കെതിരെ റൺസ് നേടുമ്പോൾ ഒരുപാട് ആത്മവിശ്വാസം ലഭിക്കുമെന്നും അസം പറഞ്ഞു.

രണ്ട് ടെസ്റ്റിൽ നിന്ന് 210 റൺസ് നേടിയ ബാബർ അസം തന്നെയാണ് പരമ്പരയിൽ പാകിസ്ഥാന്റെ ടോപ് സ്കോററും. മൂന്ന് വർഷം മുൻപ് ഓസ്‌ട്രേലിയയിൽ വന്നപ്പോൾ തനിക്ക് ഇത്ര അനുഭവസമ്പത്ത് ഉണ്ടായിരുന്നില്ലെന്നും അന്താരാഷ്ട്ര ക്രിക്കറ്റിൽ കളിച്ചാണ് തനിക്ക് മികച്ച പ്രകടനം പുറത്തെടുക്കാൻ കഴിഞ്ഞതെന്നും അസം പറഞ്ഞു. വിരാട് കോഹ്‌ലി, സ്റ്റീവ് സ്മിത്ത്, കെയ്ൻ വില്യംസൺ, ജോ റൂട്ട് എന്നിവരോട് തന്നെ താരതമ്യം ചെയ്യുന്നത് ശരിയല്ലെന്നും താൻ കുറച്ച് മത്സരങ്ങൾ മാത്രമാണ് കളിച്ചതെന്നും ബാബർ അസം പറഞ്ഞു.

ഇന്ത്യൻ ഫാസ്റ്റ് ബൗളർമാർ വളരെ മികച്ചതാണെന്ന് മുൻ ഓസ്‌ട്രേലിയൻ ക്യാപ്റ്റൻ റിക്കി പോണ്ടിങ്. അതെ സമയം ഇന്ത്യൻ സ്പിൻ നിര ഓസ്ട്രേലിയയിൽ മികച്ച പ്രകടനം പുറത്തെടുക്കാൻ കഷ്ട്ടപെടുമെന്നും റിക്കി പോണ്ടിങ് പറഞ്ഞു. ഓസ്ട്രേലിയയിൽ ഓസ്ട്രേലിയ ഇന്ത്യൻ ബൗളിംഗ് നിരയെക്കാൾ മികച്ചതാണെന്നും പോണ്ടിങ് പറഞ്ഞു.

രവിചന്ദ്ര അശ്വിനും രവീന്ദ്ര ജഡേജയും മികച്ച താരങ്ങൾ ആണെന്നും എന്നാൽ അവർ ഓസ്ട്രേലിയയിൽ മികച്ച പ്രകടനം പുറത്തെടുക്കാൻ പാടുപെടുമെന്നും പോണ്ടിങ് പറഞ്ഞു.  ഓസ്‌ട്രേലിയൻ സ്പിന്നർ നാഥാൻ ലിയോൺ ഓസ്‌ട്രേലിയൻ മണ്ണിൽ ഇന്ത്യൻ താരങ്ങളേക്കാൾ മികച്ച റെക്കോർഡ് ഉണ്ടെന്നും പോണ്ടിങ് പറഞ്ഞു.

വ്യത്യസ്‍തയുള്ള ബൗളിംഗ് നിരയുള്ളത് ഓസ്‌ട്രേലിയക്ക് മറ്റു ടീമുകളെക്കാൾ കൂടുതൽ ജയാ സാധ്യത നൽകുന്നുവെന്നും മുൻ ഓസ്‌ട്രേലിയൻ ക്യാപ്റ്റൻ പറഞ്ഞു. പാകിസ്ഥാനെതിരെയുള്ള പരമ്പര 2-0ന് ജയിച്ച് ഓസ്ട്രേലിയ ലോക ടെസ്റ്റ് ചാമ്പ്യൻഷിപ്പിൽ രണ്ടാം സ്ഥാനത്ത് ആധിപത്യം ഉറപ്പിച്ചിരുന്നു.

പ്രായത്തിൽ തട്ടിപ്പ് നടത്തിയ ഡൽഹി താരം പ്രിൻസ് യാദവിന് രണ്ട് സീസൺ വിലക്കേർപ്പെടുത്തി ബി.സി.സി.ഐ. ഇതോടെ അടുത്ത രണ്ട് സീസണിൽ പ്രിൻസ് യാദവിന് ആഭ്യന്തര മത്സരങ്ങളിൽ കളിക്കാൻ സാധിക്കില്ല. അണ്ടർ 19 മത്സരങ്ങളിൽ പങ്കെടുക്കാൻ വേണ്ടി പ്രായത്തിൽ തട്ടിപ് നടത്തിയതാണ് താരത്തിന് വിനയായത്. വിലക്ക് കാലാവധിക്ക് ശേഷം താരത്തിന് സീനിയർ ക്രിക്കറ്റിൽ മാത്രമേ കളിക്കാൻ സാധിക്കുകയുള്ളു.

ഇതോടെ 2020-21, 2021-22 സീസണിൽ താരത്തിന് കളിക്കാനാവില്ല. 2001 ഡിസംബർ 12 തന്റെ ജന്മദിനമായിട്ടുള്ള സർട്ടിഫിക്കറ്റാണ് താരം സമർപ്പിച്ചത്. എന്നാൽ താരത്തിന്റെ യഥാർത്ഥ ജന്മദിനം 1996 ജൂൺ 10 ആയിരുന്നു.  ഡൽഹി ക്രിക്കറ്റ് അസോസിയേഷനിൽ രജിസ്റ്റർ ചെയ്ത താരമായ പ്രിൻസ് യാദവിനെതിരെ പരാതി ലഭിക്കുകയും അത് അന്വേഷിച്ച ബി.സി.സി.ഐ താരം പ്രായത്തിൽ തട്ടിപ്പ് നടത്തിയെന്ന് കണ്ടെത്തുകയായിരുന്നു. ഇതോടെയാണ് താരത്തെ വിലക്കാൻ ബി.സി.സി.ഐ തീരുമാനിച്ചത്.

അഹമ്മദാബാദിൽ പണികഴിപ്പിക്കുന്ന ലോകത്തിലെ ഏറ്റവും വലിയ ക്രിക്കറ്റ് സ്റ്റേഡിയത്തിന്റെ ഉദ്‌ഘാടനത്തിന് വേൾഡ് ഇലവൻ – ഏഷ്യൻ ഇലവൻ മത്സരം സംഘടിപ്പിക്കാൻ ബി.സി.സി.ഐ. 700 കോടി മുടക്കി പണികഴിപ്പിക്കുന്ന അഹമ്മദാബാദിലെ സർദാർ പട്ടേൽ സ്റ്റേഡിയം അടുത്ത മാർച്ചിൽ പണി തീർന്ന് ഉദ്ഘാടനം ചെയ്യപെടുമെന്നാണ് കരുതുന്നത്. 2017 ജനുവരിയിലാണ് സ്റ്റേഡിയത്തിന്റെ നിർമ്മാണം തുടങ്ങിയത്.

ഒരു ലക്ഷത്തിൽ അധികം കാണികളെ ഉൾകൊള്ളാൻ കഴിയുന്ന അഹമ്മദാബാദിലെ സ്റ്റേഡിയം മെൽബൺ ക്രിക്കറ്റ് സ്റ്റേഡിയത്തിനേക്കാൾ കാണികളെ ഉൾകൊള്ളാൻ കഴിയും. മത്സരത്തിന് ഐ.സി.സിയുടെ അംഗീകാരം ലഭിക്കാൻ വേണ്ടി ശ്രമം തുടങ്ങുമെന്ന് സൗരവ് ഗാംഗുലി വ്യക്തമാക്കിയിട്ടുണ്ട്. ഇന്ത്യൻ പ്രധാനമന്ത്രി നരേന്ദ്ര മോഡി സ്റ്റേഡിയം ഉദ്ഘാടനം ചെയ്യപെടുമെന്നാണ് കരുതപ്പെടുന്നത്