Author: Staff Reporter

പത്തു വർഷത്തെ ഇടവേളക്ക് ശേഷം പാകിസ്ഥാൻ ടെസ്റ്റ് ടീമിൽ ഇടം നേടി ഫവാദ് ആലം.  2009ൽ അവസാനമായി പാകിസ്ഥാന് ടെസ്റ്റ് കളിച്ച ഫവാദ് ആലം ശ്രീലങ്കക്കെതിരായ ടെസ്റ്റിനുള്ള പാകിസ്ഥാൻ ടീമിലാണ് ഇടം പിടിച്ചത്. 10 വർഷത്തിന് ശേഷം ടെസ്റ്റ് ക്രിക്കറ്റ് പാകിസ്ഥാനിലേക്ക് തിരിച്ചെത്തുന്ന പരമ്പരകൂടിയാണ് ശ്രീലങ്കക്കെതിരെയുള്ളത്. ഫവാദ് ആലമിനെ കൂടാതെ ഉസ്മാൻ ഷിൻവാരിക്ക് ആദ്യമായി ടെസ്റ്റ് ടീമിൽ ഇടം ലഭിച്ചിട്ടുണ്ട്.

ആഭ്യന്തര ക്രിക്കറ്റിൽ ഫവാദ് ആലം പുറത്തെടുത്ത മികച്ച പ്രകടനമാണ് താരത്തിന് പാകിസ്ഥാൻ ടീമിൽ അവസരം നൽകിയത്. മുൻപ് പാകിസ്ഥാന് വേണ്ടി മൂന്ന് ടെസ്റ്റ് മത്സരങ്ങൾ കളിച്ച ഫവാദ് അലി ഒരു സെഞ്ചുറിയും സ്വന്തമാക്കിയിട്ടുണ്ട്. താരം പാകിസ്ഥാന് വേണ്ടി 38 ഏകദിന മത്സരങ്ങളും 24 ടി20 മത്സരങ്ങളും താരം കളിച്ചിട്ടുണ്ട്. പരമ്പരയിലെ ആദ്യ ടെസ്റ്റ് മത്സരം ഡിസംബർ 11ന് തുടങ്ങും.

Pakistan: Azhar Ali (c), Abid Ali, Asad Shafiq, Babar Azam, Fawad Alam, Haris Sohail, Imam-ul-Haq, Imran Khan, Kashif Bhatti, Mohammad Abbas, Mohammad Rizwan (wk), Naseem Shah, Shaheen Shah Afridi, Shan Masood, Yasir Shah, Usman Shinwari

വെസ്റ്റിൻഡീസിനെതിരായ മത്സരത്തിൽ കൂറ്റൻ സ്കോർ പിന്തുടർന്ന് ജയിച്ച ഇന്ത്യക്ക് പുതിയ റെക്കോർഡ്. മത്സരത്തിൽ വെസ്റ്റിൻഡീസ് ഉയർത്തിയ 207 റൺസ് എന്ന കൂറ്റൻ ലക്‌ഷ്യം പിന്തുടർന്ന് ഇന്ത്യ 6 വിക്കറ്റിന് ജയം സ്വന്തമാക്കിയിരുന്നു. ഇത് ടി20 യിൽ ഇന്ത്യ പിന്തുടർന്ന് ജയിക്കുന്ന ഏറ്റവും വലിയ സ്കോറാണ്.  നേരത്തെ 2009ൽ ശ്രീലങ്കക്കെതിരെ 206 റൺസ് പിന്തുടർന്ന് ജയിച്ചതായിരുന്നു ഇതുവരെ ഇന്ത്യയുടെ ഏറ്റവും വലിയ ചേസിംഗ്.

മത്സരത്തിൽ 94 റൺസ് നേടിയ പുറത്താവാതെ നിന്ന വിരാട് കോഹ്‌ലിയുടെ പ്രകടനമാണ് ഇന്ത്യക്ക് ജയം അനായാസമാക്കിയത്. 200ന് മുകളിൽ മൂന്ന് തവണ പിന്തുടർന്ന് ജയിച്ച ഇന്ത്യ ഈ നേട്ടം സ്വന്തമാക്കുന്ന ആദ്യ ടീം കൂടിയായി. കൂടാതെ ഇന്ത്യയിൽ പിന്തുടർന്ന് ജയിക്കുന്ന രണ്ടാമത്തെ വലിയ സ്കോർ കൂടിയാണ് ഇത്.  2016 ടി20 ലോകകപ്പിൽ സൗത്ത് ആഫ്രിക്കക്കെതിരെ 230 റൺസ് പിന്തുടർന്ന് ജയിച്ച ഇംഗ്ലണ്ടിന്റെ പേരിലാണ് നിലവിൽ ഈ റെക്കോർഡ്.

മുൻ ഇന്ത്യൻ ക്യാപ്റ്റൻ മുഹമ്മദ് അസ്ഹറുദീന്റെ പേരിൽ ഹൈദരാബാദിലെ രാജീവ് ഗാന്ധി ഇന്റർനാഷണൽ സ്റ്റേഡിയത്തിൽ പുതിയ സ്റ്റാൻഡ്. ഇന്ന് നടക്കുന്ന ഇന്ത്യ – വെസ്റ്റിൻഡീസ് ടി20 മത്സരത്തിന് മുന്നോടിയായി മുൻ ഇന്ത്യൻ താരം സുനിൽ ഗാവസ്‌കർ സ്റ്റാൻഡ് ഉദ്‌ഘാടനം ചെയ്യപെടുമെന്നാണ് കരുതപ്പെടുന്നത്.

നിലവിൽ ഹൈദരാബാദ് ക്രിക്കറ്റ് അസോസിയേഷൻ പ്രസിഡണ്ട് കൂടിയാണ് അസ്ഹർ. നിലവിൽ നോർത്ത് സ്റ്റാൻഡ് എന്ന പേരിലുള്ള സ്റ്റാൻഡ് ആണ് അസ്ഹറിന്റെ പേരിലേക്ക് മാറ്റപെടുക. മുൻ ഇന്ത്യൻ താരം വി.വി.എസ് ലക്ഷ്മണിന്റെ പേരിലുള്ള സ്റ്റാൻഡിന് മുകളിലാവും ഈ സ്റ്റാൻഡ്.

കൂടാതെ ഇന്ത്യൻ ടീമിന് വേണ്ടി കളിച്ച എല്ലാ ഹൈദരാബാദ് താരങ്ങളെയും ആദരിക്കുന്ന ഒരു ചടങ്ങ് കൂടി മത്സരത്തിന് മുൻപ് നടത്താൻ ഹൈദരാബാദ് ക്രിക്കറ്റ് അസോസിയേഷൻ തീരുമാനിച്ചിട്ടുണ്ട്. അസ്ഹർ പ്രസിഡന്റായി തിരഞ്ഞെടുക്കപ്പെട്ടതിന് ശേഷം ഹൈദരാബാദ് ക്രിക്കറ്റ് അസോസിയേഷൻ നടത്തുന്ന ആദ്യ മത്സരം കൂടിയാണിത്.

പുരുഷന്മാരുടെ ഏകദിന മത്സരം നിയന്ത്രിക്കുന്ന ആദ്യ വനിത മാച്ച് റഫറിയായി ഇന്ത്യക്കാരിയായ ജി.എസ്. ലക്ഷ്മി.  ഡിസംബർ 8ന് ഷാർജ ക്രിക്കറ്റ് സ്റ്റേഡിയത്തിൽ വെച്ച് നടക്കുന്ന ഐ.സി.സി പുരുഷക്രിക്കറ്റ് വേൾഡ് കപ്പ് ലീഗ് 2ലെ ഉദ്‌ഘാടന മത്സരത്തിലാണ് ജി.സ് ലക്ഷ്മി മാച്ച് റഫറിയാവുക.

നേരത്തെ ഐ.സി.സിയുടെ ഇന്റർനാഷണൽ മാച്ച് റഫറിമാരുടെ പാനൽ പട്ടികയിലേക്ക് ജി.എസ് ലക്ഷ്മി തിരഞ്ഞെടുക്കപ്പെട്ടിരുന്നു. 2008-09 കാലഘട്ടത്തിൽ ആഭ്യന്തര വനിത ക്രിക്കറ്റിൽ മാച്ച് റഫറിയായാണ് ലക്ഷ്മി ആദ്യമായി മത്സരം നിയന്ത്രിച്ച് തുടങ്ങിയത്.  ഇതുവരെ മൂന്ന് വനിതാ ഏകദിന മത്സരങ്ങൾക്കും 16 പുരുഷ അന്താരാഷ്ട്ര ടി20 മത്സരങ്ങൾക്കും 7 വനിത ടി20 ഇന്റർനാഷണൽ മത്സരങ്ങൾക്കും ലക്ഷ്മി മാച്ച് റഫറിയായി ചുമതല വഹിച്ചിട്ടുണ്ട്.

 

ടി20യിൽ ആദ്യം ബാറ്റ് ചെയ്യുമ്പോൾ ഇന്ത്യ കുറച്ചുകൂടെ മെച്ചപ്പെട്ട പ്രകടനം പുറത്തെടുക്കണമെന്ന് ബി.സി.സി.ഐ പ്രസിഡണ്ട് സൗരവ് ഗാംഗുലി. സ്കോർ പിന്തുടരുമ്പോൾ ഇന്ത്യ മെച്ചപ്പെട്ട പ്രകടനം പുറത്തെടുക്കുന്നുണ്ടെന്നും എന്നാൽ ആദ്യം ബാറ്റ് ചെയ്യുമ്പോൾ കുറച്ചുകൂടെ മെച്ചപ്പെട്ട പ്രകടനം ഇന്ത്യൻ പുറത്തെടുക്കണമെന്നും ഗാംഗുലി പറഞ്ഞു.

തനിക്ക് കുറച്ച് കാര്യങ്ങൾ പറയാൻ ഉണ്ടെന്നും അതെല്ലാം താൻ വിരാട് കോഹ്‌ലിയോടും ഇന്ത്യൻ പരിശീലകൻ രവി ശാസ്ത്രിയോടും പറയുമെന്നും സൗരവ് ഗാംഗുലി പറഞ്ഞു.  ടി20യിൽ ഇന്ത്യൻ നിലവിൽ ഒരുപാട് മത്സരങ്ങൾ കളിച്ചിട്ടില്ലെന്നും ലോകകപ്പിന്റെ സമയമാവുമ്പോൾ ഇന്ത്യ തയ്യാറാവുമെന്നും ഗാംഗുലി പറഞ്ഞു.

നാളെ തുടങ്ങാനിരിക്കുന്ന ഇന്ത്യയും വെസ്റ്റിൻഡീസും തമ്മിലുള്ള പരമ്പരയിൽ ഓവർ സ്റ്റെപ്പിനുള്ള നോ ബോൾ വിളിക്കുക തേർഡ് അമ്പയർ. ഇത് പ്രകാരം ഗ്രൗണ്ടിലുള്ള അമ്പയർ ഓവർ സ്റ്റെപ്പിനുള്ള നോ ബോൾ വിളിക്കില്ലെന്ന് ഐ.സി.സി വ്യക്തമാക്കി. മത്സരത്തിൽ മുഴുവൻ പന്തുകളും തേർഡ് അമ്പയർ പരിശോധിക്കുകയും നോ ബോൾ ആണെങ്കിൽ ഗ്രൗണ്ടിലുള്ള അമ്പയറെ അറിയിക്കുകയും ചെയ്യും.

ഇത്തരം സാഹചര്യങ്ങളിൽ നോ ബോളിൽ ബാറ്റ്സ്മാൻ ഔട്ട് ആവുകയും തേർഡ് അമ്പയർ നോ ബോൾ വിളിക്കാൻ നേരം വൈകുകയും ചെയ്താൽ നോ ബോൾ ആണെന്ന് അറിയുന്ന പക്ഷം ബാറ്റ്സ്മാനെ തിരിച്ചുവിളിക്കാൻ ഗ്രൗണ്ടിലെ അമ്പയർക്ക് അധികാരം ഐ.സി.സി നൽകുന്നുണ്ട്.

അടുത്ത വർഷം നടക്കുന്ന ഇന്ത്യൻ പ്രീമിയർ ലീഗിൽ നോ ബോൾ വിളിക്കാൻ നാലാമത് ഒരു അമ്പയറെ നിയമിക്കാൻ ഐ.പി.എൽ ഗവേർണിംഗ് ബോഡി തീരുമാനിച്ചിരുന്നു.

ന്യൂസിലാൻഡ് ക്യാപ്റ്റൻ കെയ്ൻ വില്യംസണെ ഓസ്‌ട്രേലിയൻ ബാറ്റ്സ്മാൻ സ്റ്റീവ് സ്മിത്തിനോട് ഉപമിച്ച് മുൻ ഓസ്‌ട്രേലിയൻ ക്യാപ്റ്റൻ റിക്കി പോണ്ടിങ്. ടെസ്റ്റ് കളിക്കുമ്പോൾ സ്റ്റീവ് സ്മിത്തിന്റെ ശൈലിയാണ് താരത്തിനെന്ന് പോണ്ടിങ് പറഞ്ഞു. ടെസ്റ്റിൽ സ്റ്റീവ് സ്മിത്തിനെ പോലെ താരത്തെ പുറത്താക്കാൻ എളുപ്പമല്ലെന്നും പോണ്ടിങ് കൂട്ടിച്ചേർത്തു.

2011ൽ ഓസ്ട്രേലിയ നേരിട്ട സമയത്ത് കണ്ട കെയ്ൻ വില്യംസൺ അല്ല ഇപ്പോൾ എന്നും പോണ്ടിങ് പറഞ്ഞു. നിലവിൽ ആരെക്കാളും മികച്ച രീതിയിൽ വില്യംസൺ ബാറ്റ് ചെയ്യുന്നുണ്ടെന്നും സ്ഥിരമായി മികച്ച പ്രകടനമാണ് താരം പുറത്തെടുക്കുന്നതെന്നും വില്യംസൺ പറഞ്ഞു. നിലവിൽ കെയ്ൻ വില്യംസൺ ലോകത്തെ മികച്ച താരങ്ങളിൽ പെട്ട ഒരാൾ ആണെന്നും പോണ്ടിങ് പറഞ്ഞു. ഇപ്പോൾ വില്യംസൺ സാധാരണ ഒരു ടി20 താരത്തിൽ നിന്ന് മികച്ചൊരു താരമായി മാറിയെന്നും മുൻ ഓസ്‌ട്രേലിയൻ ക്യാപ്റ്റൻ കൂട്ടിച്ചേർത്തു.

വൈറ്റ് ബോൾ ക്രിക്കറ്റിലേക്ക് മടങ്ങി വരൻ ഒരുങ്ങി ഇന്ത്യൻ സ്പിന്നർ രവിചന്ദ്ര അശ്വിൻ. 2017ന് ശേഷം അശ്വിൻ ടെസ്റ്റ് ക്രിക്കറ്റിൽ മാത്രമാണ് ഇന്ത്യക്ക് വേണ്ടി കളിക്കുന്നത്. 2017ൽ വെസ്റ്റിൻഡീസിനെതിരെ ഏകദിന മത്സരം കളിച്ചതിന് ശേഷം അശ്വിൻ ഇന്ത്യക്ക് വേണ്ടി വൈറ്റ് ബോൾ ക്രിക്കറ്റിൽ കളിച്ചിട്ടില്ല. തനിക്ക് ഇന്ത്യക്ക് വേണ്ടി കളിക്കണമെന്നും ഏകദിനത്തിലും ടി20യിലും തന്റെ റെക്കോർഡുകൾ വളരെ മികച്ചതാണെന്നും അശ്വിൻ പറഞ്ഞു. അത് കൊണ്ട് തന്നെ ഇന്ത്യൻ ടീമിലേക്ക് തിരിച്ചുവരാനുള്ള കഠിനശ്രമത്തിലാണ് താനെന്നും അശ്വിൻ കൂട്ടിച്ചേർത്തു.

ഒരു ഘട്ടത്തിൽ വൈറ്റ് ബോൾ ക്രിക്കറ്റിനുള്ള ഇന്ത്യൻ ടീമിൽ നിന്ന് പുറത്തുപോയപ്പോൾ തനിക്ക് ക്രിക്കറ്റ് കളിക്കുമ്പോൾ ലഭിക്കുന്ന സന്തോഷം നഷ്ടപ്പെട്ടുവെന്നും അശ്വിൻ പറഞ്ഞു. പരിക്കും ടീമിൽ നിന്ന് പുറത്തു പോവലും കൂടി വന്നതോടെ താൻ ടി.വിയിൽ ക്രിക്കറ്റ് കാണുന്നത് തന്നെ നിർത്തിയെന്നും അശ്വിൻ പറഞ്ഞു. എന്നാൽ തന്റെ കൂടെയുള്ള ആൾക്കാരുടെ സഹായത്തോടെ താൻ ആ ഘട്ടം തരണം ചെയ്‌തെന്നും താൻ ഇപ്പോൾ കളിക്കാൻ ലഭിക്കുന്ന അവസരത്തിൽ എല്ലാം സന്തോഷത്തോടെയും ആത്മാർത്ഥതയോടെയുമാണ് കളിക്കുന്നതെന്നും അശ്വിൻ പറഞ്ഞു.