Author: Staff Reporter

അടുത്ത മൂന്ന് ലോകകപ്പ് ടൂർണമെന്റുകളിൽ ഇന്ത്യ രണ്ടെണ്ണമെങ്കിലും ജയിക്കണമെന്ന് ഇന്ത്യൻ വൈസ് ക്യാപ്റ്റൻ രോഹിത് ശർമ്മ. യുവതാരങ്ങൾക്ക് ഇന്ത്യൻ ടീമിൽ ശോഭിക്കാൻ ഇന്ത്യൻ ടീം മാനേജ്‌മന്റ് ആവശ്യമായ അവസരങ്ങൾ നൽകുന്നുണ്ടെന്നും രോഹിത് ശർമ്മ പറഞ്ഞു. മുൻ ഇന്ത്യൻ താരം ഹർഭജൻ സിംഗുമായുള്ള ഇൻസ്റ്റാഗ്രാം ലൈവ് ചാറ്റിനിടെയാണ് രോഹിത് ശർമ്മ ഈ അഭിപ്രായവുമായി രംഗത്തെത്തിയത്.

2020ലേക്കും 2021ലെയും ടി20 ലോകകപ്പും 2023ലെ ഏകദിന ലോകകപ്പുമാണ് ഇന്ത്യക്ക് മുൻപിലുള്ളത്.  2013ൽ ചാമ്പ്യൻസ് ലീഗ് ട്രോഫി കിരീടം നേടിയതിന് ശേഷം ഇന്ത്യ ഐ.സി.സിയുടെ ഒരു ടൂർണമെന്റും വിജയിച്ചിട്ടില്ല.  2019ലെ ലോകകപ്പിൽ 5 സെഞ്ചുറികൾ അടിച്ച് രോഹിത് ശർമ്മ മികച്ച ഫോമിൽ ആയിരുന്നെങ്കിലും ഇന്ത്യ സെമിഫൈനലിൽ ന്യൂസിലൻഡിനോട് പരാജയപ്പെടുകയായിരുന്നു. കഴിഞ്ഞ വർഷം നടന്ന ലോകകപ്പ് സെമി ഫൈനലിൽ ന്യൂസിലാൻഡിനെതിരെ ഇന്ത്യ തോൽക്കാൻ കാരണം ആദ്യ അരമണിക്കൂറിൽ ഇന്ത്യക്ക് വിക്കറ്റുകൾ നഷ്ട്ടമായതാണെന്നും രോഹിത് ശർമ്മ പറഞ്ഞു.

മുൻ ഇന്ത്യൻ ക്യാപ്റ്റൻ മഹേന്ദ്ര സിംഗ് ധോണി ഇനി ഇന്ത്യക്ക് വേണ്ടി കളിക്കില്ലെന്നാണ് തന്റെ വിശ്വാസമെന്ന് മുൻ ഇന്ത്യൻ സ്പിന്നർ ഹർഭജൻ സിംഗ്. ഇന്ത്യൻ ഓപ്പണർ രോഹിത് ശർമ്മയുമായുള്ള ഇൻസ്റ്റാഗ്രാം ലൈവിനിടെയുള്ള ചോദ്യത്തിന് മറുപടിയായാണ് ഹർഭജൻ സിംഗ് ധോണി ഇന്ത്യക്ക് വേണ്ടി ഇനി കളിക്കില്ലെന്ന് പറഞ്ഞത്. തനിക്കറിയാവുന്നിടത്തോളം ധോണി വീണ്ടും ഇന്ത്യൻ ജേഴ്‌സിയിൽ കളിക്കില്ലെന്നും പക്ഷെ ചെന്നൈ സൂപ്പർ കിങ്സിന് വേണ്ടി ധോണി ഐ.പി.എൽ. തീർച്ചയായും കളിക്കുമെന്നും ഹർഭജൻ സിംഗ് പറഞ്ഞു.

കഴിഞ്ഞ വർഷം ജൂലൈ മാസത്തിൽ ലോകകപ്പ് സെമിയിൽ ന്യൂസിലാൻഡിനെതിരെ കളിച്ചതിന് ശേഷം ധോണി ഇന്ത്യക്ക് വേണ്ടി കളിച്ചിട്ടില്ല. ഐ.പി.എല്ലിൽ കൂടി ധോണി ഇന്ത്യൻ ടീമിലേക്ക് തിരിച്ചുവരാനുള്ള ശ്രമം നടത്തുമെന്ന് വാർത്തകൾ ഉണ്ടായിരുന്നെങ്കിലും ഐ.പി.എൽ അനിശ്ചിതമായി നീട്ടിവെച്ചതോടെ ധോണിയുടെ തിരിച്ചുവരവിന് അത് തിരിച്ചടിയായിരുന്നു.

താൻ കളിക്കുന്ന കാലഘട്ടത്തിൽ ഇന്ത്യൻ താരങ്ങൾ സെഞ്ചുറി നേടിയത് വ്യക്തിഗത നേട്ടങ്ങൾ വേണ്ടിയാണ് മുൻ പാകിസ്ഥാൻ താരം ഇൻസമാമുൽ ഹഖ്. പേപ്പറിൽ ഇന്ത്യൻ താരങ്ങൾ മികച്ചവരെയിരുന്നെവെന്നും എന്നാൽ 30-40 റൺസ് എടുക്കുന്ന പാകിസ്ഥാൻ താരങ്ങൾ ടീമിന് വേണ്ടിയാണ് കളിച്ചതെന്നും ഇൻസമാം പറഞ്ഞു. അതെ സമയം ഇന്ത്യൻ താരങ്ങൾ 100 റൺസ് നേടിയാലും അത് അവരുടെ വ്യക്തിഗത നേട്ടങ്ങൾക്ക് വേണ്ടിയാണെന്നും ടീമിന് വേണ്ടിയായിരുന്നില്ലെന്നും മുൻ പാകിസ്ഥാൻ താരം പറഞ്ഞു.

ഇതായിരുന്നു രണ്ട് ടീമുകളും തമ്മിലുള്ള വിത്യാസമെന്നും ഇൻസമാം പറഞ്ഞു. മുൻ പാകിസ്ഥാൻ താരം റമീസ് രാജയുമായുള്ള അഭിമുഖത്തിനിടെയാണ് ഇൻസമാം ഈ കാര്യങ്ങൾ വെളിപ്പെടുത്തിയത്. പാകിസ്ഥാന് വേണ്ടി 120 ടെസ്റ്റ് മത്സരങ്ങളും 378 ഏകദിന മത്സരങ്ങളും 1 ടി20 മത്സരവും ഇൻസമാം കളിച്ചിട്ടുണ്ട്.