Author: shabeerahamed

IPL സീസൺ 2022ന്റെ ആദ്യ റൗണ്ടിലെ 70 കളികളിൽ 48 എണ്ണം കഴിഞ്ഞിട്ടും പ്ലേ ഓഫ് ലൈൻഅപ്പ് ഇത് വരെ വ്യക്തമായിട്ടില്ല. അടുത്ത റൗണ്ടുകൾ കൊൽക്കത്തയിലും അഹമ്മദാബാദിലും വച്ചാകും നടക്കുക എന്ന് ബിസിസിഐ വ്യക്തമാക്കിയിട്ടുണ്ട്. ആദ്യ ക്വാളിഫയർ മേയ് 24നും, എലിമിനേറ്റർ 25നും ഈഡൻ ഗാർഡൻസിൽ വച്ച് നടക്കും. രണ്ടാം ക്വാളിഫയർ 27നും, ഫൈനൽസ് 29നും അഹമ്മദാബാദിൽ വച്ച് നടക്കും.

ആകെ ഉറപ്പിക്കാവുന്നതു മുംബൈ ഇന്ത്യൻസിന്റെ കാര്യമാണ്. അവർക്ക് ഈ റൗണ്ട് കഴിഞ്ഞാൽ ഇവിടെ കാര്യമില്ല. പക്ഷെ ബാക്കിയുള്ള ടീമുകളുടെ കാര്യം അങ്ങനെയല്ല. കണക്കിലെ കളികൾ വച്ച് നോക്കിയാൽ അവരിൽ ആർക്കു വേണമെങ്കിലും അടുത്ത റൗണ്ടിൽ കടക്കാം. ചിലർക്ക് എളുപ്പമാണ്, മറ്റ് ചിലർക്ക് കടുപ്പവും. പക്ഷെ ആരെയും തള്ളി കളയാൻ ഈ സമയം സാധിക്കില്ല. ടീം മാനേജ്മെന്റുകൾ ഇപ്പോൾ കാൽക്കുലേറ്റർ പോക്കറ്റിൽ ഇട്ടാണ് നടപ്പു. സ്വന്തം ടീമുകളുടെ വിജയപരാജയങ്ങൾ മാത്രമല്ല, മറ്റു ടീമുകളുടെ ഇനിയുള്ള പ്രകടനങ്ങളും തങ്ങളെ ബാധിക്കും എന്ന് അവർക്ക് അറിയാം.

ഇപ്പോൾ ആദ്യ സ്ഥാനത്തു നിൽക്കുന്ന ഹാര്ദിക്ക് പാണ്ട്യയുടെ ഗുജറാത്തിനു പോലും ഇനിയും ഒന്നോ രണ്ടോ വിജയങ്ങൾ നേടാതെ പറ്റില്ല. അതെ സമയം ഇനിയുള്ള കളികൾ നഷ്ടപ്പെട്ടാൽ പിന്നെ പറയുകയും വേണ്ട. മറ്റുള്ള എല്ലാ ടീമുകൾക്കും ഇനിയുള്ള മിക്ക കളികളും ജയിച്ചേ മതിയാകൂ. എന്നാലും പിന്നെയും റൺ റേറ്റിന്റെ പുറത്താകും തീരുമാനങ്ങൾ.

അത് കൊണ്ട് തന്നെ, ടീമുകൾ എല്ലാം തന്നെ ജയത്തിൽ കുറഞ്ഞ ഒന്നും ഇനിയുള്ള ദിവസങ്ങളിൽ ഉറ്റുനോക്കുന്നില്ല. വരും ദിവസങ്ങളിൽ ഓരോരോ ടീമുകളായി കൊഴിഞ്ഞു പോകുന്ന കാഴ്ചയാകും കാണുക. ഒരു മാസത്തിലേറെയായി ബയോബബിളിൽ കഴിയുന്ന കളിക്കാരെ ഇനിയും 20 ദിവസത്തേക്ക് കൂടി മാനസികമായും ശാരീരികമായും തളരാതെ പിടിച്ചു നിറുത്തുക എന്നതാകും മാനേജ്മെന്റുകളെ സംബന്ധിച്ചു ഏറ്റവും വലിയ വെല്ലുവിളി. വരും ദിവസങ്ങളിൽ പിച്ചിൽ ഇറങ്ങുമ്പോൾ കളിയിൽ ഫോക്കസ് ചെയ്തു പിടിച്ചു നിൽക്കാൻ സാധിക്കുന്ന ടീമുകൾക്കാവും കൽക്കത്തക്കും അഹമ്മദാബാദിനും പറക്കാൻ ഭാഗ്യമുണ്ടാവുക.

ഇന്നലെ ചെന്നൈ ഫാൻസിന് ആഘോഷ രാവായിരുന്നു. ഒന്നു, തല തലപ്പത്തേക്ക് തിരിച്ചു വന്ന്. രണ്ടു, ചെന്നൈ സണ് റൈസേർസ് ഹൈദരാബാദിന് മേൽ ആധികാരികമായ വിജയം നേടി. നല്ല കാര്യം, ലോക ക്രിക്കറ്റിൽ തന്നെ മികച്ച ക്യാപ്റ്റന്മാരുടെ നിരയിൽ മുൻപന്തിയിൽ ഉള്ളയാളാണ് ചെന്നൈയുടെ തല ധോണി.

പക്ഷെ, ധോണി തിരിച്ചു ക്യാപ്റ്റൻ ആയി വന്നത് കൊണ്ട് മാത്രം ചെന്നൈ ജയിക്കുമോ? അങ്ങനൊരു കാരണം നമുക്ക് പറയാൻ പറ്റില്ല. ഏറ്റവും കുറഞ്ഞത് കഴിഞ്ഞ സീസണ് ഓർത്തു നോക്കണം. ഇന്നത്തെ വിജയം ധോണിയുടെ ക്യാപ്റ്റൻസിയുടെ ഗുണം കൊണ്ടാണ് എന്നു ആരും പറയില്ല.

ഋതുരാജ് ഗെയ്‌ക്വാദിന്റെ മിന്നും പ്രകടനമാണ് ചെന്നൈക്ക് ഈ വിജയം നേടി കൊടുത്തത്. ഒപ്പം ഒന്നാം വിക്കറ്റിൽ കോണ്വേയോടൊപ്പം ഉയർത്തിയ കൂട്ടുകെട്ടും. ചെന്നൈയുടെ ഐപിഎൽ ചരിത്രത്തിലെ തന്നെ ഏറ്റവും ഉയർന്ന കൂട്ടുകെട്ടാണ് ഒന്നാം വിക്കറ്റിൽ അവർ നേടിയത്.

രണ്ടാമത് ബാറ്റ് ചെയ്ത ഹൈദരാബാദ്‌ ഒരവസരത്തിൽ ചെന്നൈയുടെ സ്കോറായ 203 അനായാസം മറികടക്കും എന്ന് തോന്നിയിരുന്നു. എങ്കിലും പവർപ്ലെയിൽ അടുത്തടുത്ത ബോളുകളിൽ രണ്ട് വിക്കറ്റുകൾ വീഴ്ത്തിയ മുകേഷ് ചൗദരിയാണ് ചെന്നൈക്ക് രക്ഷകനായത്.

ചെന്നൈ ഒട്ടനവധി അവസരങ്ങൾ പാഴാക്കി. ക്യാച്ചുകൾ കൈവിട്ടു, ഫീല്ഡിങ് മോശമായിരുന്നു, പല അവസരങ്ങളിലും ക്യാപ്റ്റൻ കൂൾ എന്ന് വിളിക്കുന്ന ധോണി പോലും ക്ഷോഭിക്കുന്ന കാഴ്ചയാണ് നമ്മൾ കണ്ടത്. ധോണിയുടെ തിരിച്ചു വരവിൽ ടീമിന് കാര്യമായ ഗുണം ഒന്നും ഉണ്ടായതായി കാണാൻ കഴിഞ്ഞില്ല. ധോണിയുടെ ബാറ്റിങ്ങിലും പ്രതീക്ഷിക്കാവുന്ന ഒന്നും ഉണ്ടായിരുന്നില്ല. ക്യാപ്റ്റൻ എന്ന നിലയിൽ ടീമിനെ പ്രോത്സാഹിപ്പിച്ചു കൊണ്ടു പോകാൻ സാധിച്ചു എന്നു പറയാൻ കഴിയുന്ന ഒന്നും ഫീൽഡിൽ കണ്ടില്ല. ഒരു കളി കൊണ്ടു ഒരു പ്രകടനത്തെ അളക്കുന്നത് ശരിയല്ലാത്തത് കൊണ്ട് നമുക്ക് കാത്തിരിക്കാം, ഇനിയുള്ള കളികളിൽ തലയുടെ വിളയാട്ടം ചെന്നൈയുടെ തലവര മാറ്റുമോ എന്ന്.

ഇന്ന് 144 റൺസ് മാത്രം ഡിഫൻഡ് ചെയ്യാനായി ഗ്രൗണ്ടിലേക്ക് ഇറങ്ങുമ്പോൾ ക്യാപ്റ്റൻ സഞ്ജു ടീമിനോട് പറഞ്ഞു, നമ്മൾ വെറും 10 വിക്കറ്റ് മാത്രം എടുത്താൽ മതി, അവർക്കാണെങ്കിൽ 145 റൺസ് വേണം. 19.3 ഓവറിൽ 115 റൺസ് എടുത്തു ആർസിബി ഓൾ ഔട്ട് ആയപ്പോൾ വിജയിച്ചത് രാജസ്ഥാൻ റോയൽസ് മാത്രമല്ല, സഞ്ജുവിന്റെ ക്യാപ്റ്റൻസി കൂടിയാണ്.

IPL 2022ലെ ഏതാണ്ട് 50% കളി കഴിഞ്ഞപ്പോൾ രാജസ്ഥാൻ റോയൽസ് ആദ്യ നാലു ടീമുകളുടെ പട്ടികയിലുണ്ട്. കളിച്ച എട്ട് കളികളിൽ ആറെണ്ണം ജയിച്ചാണ് രാജസ്ഥാൻ ഈ നേട്ടം കൈവരിച്ചത്. ക്യാപ്റ്റൻ സഞ്ജുവിന് സന്തോഷിക്കാമെങ്കിലും റിലാക്സ് ചെയ്യാൻ സമയമായിട്ടില്ല. ഇനിയുമുണ്ട് ദൂരം ഏറെ താണ്ടുവാൻ.

സഞ്ജുവിന്റെ IPL ക്യാപ്റ്റന്സിയുടെ മൊത്തം പ്രകടനം എടുത്തു നോക്കിയാൽ, ക്യാപ്റ്റൻസി ഏറ്റെടുത്തു ആദ്യ കളിയിൽ തന്നെ സെഞ്ചുറി അടിച്ച ചരിത്രമാണ് നമ്മൾ ഓർക്കേണ്ടത്. പക്ഷെ ആകെ 5 കളികൾ മാത്രമാണ് കഴിഞ്ഞ സീസണിൽ സഞ്ജുവിന്റെ കീഴിൽ രാജസ്ഥാൻ ജയിച്ചത്. അതെ സമയം ഇക്കൊല്ലം 6 കളികൾ ഇത് വരെ വിജയിച്ചിട്ടുണ്ട്. IPLൽ മൊത്തം 21 കളികളിൽ ടീമിനെ നയിച്ച സഞ്ജു, 11 കളികളിൽ വിജയം നേടി.

ഇക്കൊല്ലത്തെ രാജസ്ഥാൻ റോയൽസിന്റെ തേരോട്ടം ഓർമ്മപെടുത്തുന്നത് ആദ്യ സീസണിൽ വാർണിന്റെ നേതൃത്വത്തിലുള്ള ടീമിനെയാണ്. ഓരോ ബോൾ കഴിയുമ്പോഴും ഫീൽഡ് ഒന്നുകൂടി മുറുക്കി എതിരാളികളെ കുരുക്കാൻ കരുക്കൾ നീക്കുന്ന അതെ രീതിയാണ് സഞ്ജു ഇപ്പോൾ പിന്തുടരുന്നത്. കൂടാതെ, തന്റെ കൈയ്യിലുള്ള റിസോഴ്സസ് , അത് ബോളർ ആയിക്കൊള്ളട്ടെ, ഫീൽഡർ ആയിക്കൊള്ളട്ടെ, അവരെ വേണ്ട രീതിയിൽ ഉപയോഗിക്കാൻ സഞ്ജു പഠിച്ചു കഴിഞ്ഞു. രാഹുൽ ദ്രാവിഡാണ് സഞ്ജുവിന്റെ ടെമ്പറമെന്റിൽ വലിയ മാറ്റം വരുത്തിയത്. കരിയറിന്റെ തുടക്കത്തിൽ ഉണ്ടായിരുന്ന അനാവശ്യ ചോര തിളപ്പ് മാറ്റി വച്ച് കൂൾ ഹെഡഡ് ആയി കളിക്കാൻ പഠിപ്പിച്ചത് രാഹുലാണ്‌.

ഇക്കൊല്ലം ടീമിനെ നയിക്കുന്ന സഞ്ജുവിന്റെ ഓരോ നീക്കങ്ങളിലും മുകളിൽ പറഞ്ഞ പോസിറ്റീവ് ഫാക്ടറുകൾ കാണാം. രാജസ്ഥാൻ റോയൽസിന്റെ ഇത് വരെയുള്ള കളികളിൽ ബട്ലരുടെയും, യുസിയുടെയും, പ്രസിദ്ധിന്റേയും, ഹിറ്റമേയറുടെയും, സെന്നിന്റെയും, അശ്വിന്റെയും മറ്റും പ്രകടനങ്ങൾ മികച്ചു നിൽക്കുന്നുണ്ടെങ്കിലും, ടീം എഫേർട്ട് ആണ് കളികൾ ജയിപ്പിച്ചത് എന്ന് നിസ്സംശയം പറയാം. അതിനു ഏറ്റവും അധികം ക്രെഡിറ്റ് കൊടുക്കേണ്ടത് സഞ്ജുവിന് തന്നെയാണ്. കോച്ച് സംഗക്കാര പല പ്രാവശ്യം പറഞ്ഞ പോലെ, സഞ്ജു ഒരു നാച്ചുറൽ ലീഡർ ആണ്. ടീമിനെ ക്യാപ്റ്റൻ എന്ന നിലക്ക് മുന്നോട്ടു നയിക്കുമ്പോഴും സഞ്ജു തന്റെ കീപ്പിങ്ങും ബാറ്റിങ്ങും വളരെ ഭംഗിയായി തന്നെ കളിക്കുന്നുണ്ട് എന്നതും ടീമിന് വലിയൊരു ആശ്വാസമാണ്. സ്വന്തം കളി മോശമാകുന്ന ഒരു ക്യാപ്റ്റനും ടീമിനെ നല്ല രീതിയിൽ നയിക്കാൻ സാധിക്കില്ല. കുറുമ്പും, കുസൃതിയും, കള്ളച്ചിരിയുമായി ഈ മലയാളി ക്യാപ്റ്റൻ ഇനിയും വളരെയധികം മുന്നോട്ടു പോകും എന്ന കാര്യത്തിൽ സംശയം വേണ്ട.