Author: Nihal Basheer

മൂന്നാം ഡിവിഷൻ ടീമിൽ നിന്നും സ്പെയിൻ ദേശിയ അണ്ടർ-19 ടീമിലെ സ്ഥിരക്കാരൻ ആയ പാബ്ലോ ടോറെ ഇനി ബാഴ്‌സലോണക്ക് വേണ്ടി ബൂട്ടു കെട്ടും. ലാ ലീഗ സെക്കന്റ് ഡിവിഷനിലേക്ക് സ്ഥാനക്കയറ്റം നേടിയ റേസിങ് ക്ലബ്ബിൽ നിന്നുമാണ് താരം ബാഴ്‌സയിൽ എത്തുന്നത്.

ഏകദേശം അഞ്ചു മില്യൺ യൂറോയുടെ അടിസ്ഥാന കരാറിൽ ഇരു ക്ലബ്ബുകളും നേരത്തെ എത്തിയിരുന്നു. ടോറെയുടെ പ്രകടന മികവ് അനുസരിച്ചു 20 മില്യൺ യൂറോ വരെ റേസിങ്ങിന് ബാഴ്‌സയിൽ നിന്നും നേടാൻ ആവും.

2020 മുതൽ റേസിങ് ഡെ സന്റാണ്ടർ സീനിയർ ടീമിന്റെ ഭാഗമാണ്. 48 മത്സരങ്ങൾ ഇതുവരെ ടീമിനായി കളിച്ചു. മൂന്നാം ഡിവിഷൻ ജേതാക്കൾ ആയ റേസിങ്ങിന്റെ മധ്യനിരക്ക് സീസൺ മുഴുവൻ ചാലകശക്തി ആയത് ഈ പത്തൊമ്പതുകാരൻ ആയിരുന്നു. അവസാന മത്സര ശേഷം കണ്ണീരോടെ സ്റ്റേഡിയത്തിൽ വിട പറഞ്ഞ ടോറെക്ക് ആരാധകർ വികാരനിർഭരമായ യാത്രയയപ്പാണ് നൽകിയത്.

ബാഴ്‌സ ബി ടീമിനോടൊപ്പം ആവും താരം ചേരുക. എന്നാൽ ഫസ്റ്റ് ടീമിനോടൊപ്പവും കൂടുതലായി താരത്തെ ഉപയോഗിക്കാൻ ആണ് നിലവിൽ ബാഴ്‌സ മാനേജ്‌മെന്റ് തീരുമാനം.

ബുധനാഴ്ച്ച ക്യാമ്പ് ന്യൂവിൽ വെച്ചു ബാഴ്‌സയും ടോറെയും കരാറിൽ ഒപ്പിടും. നൂറു മില്യൺ റിലീസ് ക്ലോസും കരാറിന്റെ ഭാഗമായി ഉണ്ട്.

വർഷങ്ങളായി ബാഴ്‌സ ഡിഫെൻസിലെ നട്ടെല്ലാണ് ജെറാർഡ് പിക്വേ. ടീം ക്യാപ്റ്റന്മാരിൽ ഒരാൾ. കളത്തിന് പുറത്തുള്ള ബിസിനസുകളിലും കേമൻ. സ്വന്തമായി ക്ലബ്ബ് വരെയുണ്ട്; എഫ്സി അണ്ടോറ. ഫ്രഞ്ച് ലീഗിന്റെ സ്പെയിനിലെ സംപ്രേഷണാവകാശം നേടിയത് പിക്വേക്ക് കൂടി ഓഹരിയുള്ള കോസ്മോസ് ഹോൾഡിങായിരുന്നു. എന്നാൽ കളത്തിന് പുറത്തുള്ള പിക്വേയുടെ കളികൾ കൂടുന്നതായി താരത്തോട് സൂചിപ്പിച്ചിരിക്കുകയാണ് സാവി. പൂർണമായും പിച്ചിൽ ശ്രദ്ധ കേന്ദ്രീകരിച്ചില്ലെങ്കിൽ ടീമിൽ സ്ഥാനം നൽകില്ലെന്ന് ഉറപ്പിച്ചു പറഞ്ഞിരിക്കുകയാണ് ബാഴ്‌സ കോച്ച്.

വ്യക്തിപരമായ പ്രശ്നങ്ങളിലും തന്റെ ബിസിനസുകളിലും കൂടുതലായി ശ്രദ്ധിച്ചത് കാരണം പിച്ചിലെ പ്രകടനത്തിലും താരത്തിന്റെ ഫിറ്റ്നെസിലും ഇത് പ്രതിഫലിച്ചതായി സാവി കരുതുന്നു.

എന്നാൽ താൻ പഴയ ഫോമിലേക്ക് തിരിച്ചു വരാൻ കഠിന പ്രയത്നം തന്നെ നടത്തുമെന്ന് കോച്ചിന് പിക്വേ വാക്ക് കൊടുത്തതായാണ് സ്പാനിഷ് മാധ്യമങ്ങൾ റിപ്പോർട്ട് ചെയ്യുന്നത്. ടീം വിടാനുള്ള കാര്യം പരിഗണിക്കണമെന്ന് വരെ സാവിയിൽ നിന്ന് കേട്ടതോടെ ടീമിൽ തുടരണമെങ്കിൽ അത്യധ്വാനം തന്നെ ചെയ്യേണ്ടി വരുമെന്ന തിരിച്ചറിവിൽ ആണ് പിക്വേ. പ്രസിഡന്റ് ലപോർട്ടയേയും കണ്ട് താരം ഈ കാര്യങ്ങൾ വിശദീകരിച്ചതായി മാധ്യമങ്ങൾ റിപ്പോർട്ട് ചെയ്യുന്നു.

തന്റെ കൂടിയ സോഷ്യൽ മീഡിയ ഉപയോഗം കുറക്കുമെന്നും മറ്റ് ബിസിനസുകളിൽ നിന്നും മാറി പൂർണമായും മൈതാനത്ത് തന്നെ ശ്രദ്ധിക്കുമെന്നും പിക്വേ വാക്ക് കൊടുത്തിട്ടുണ്ട്.

വേതനത്തിൽ ഈയിടെ കുറവ് വരുത്തിയിരുന്നെങ്കിലും ഇപ്പോഴും ഗണ്യമായ തുക പിക്വേക്ക് നൽകേണ്ടതിനാലാണ് പ്രകടനം മെച്ചപ്പെടുത്തുന്നില്ലെങ്കിൽ ടീം വിടുന്ന കാര്യം ഗൗരവമായി പരിഗണിക്കാൻ താരത്തോട് സാവിയും മാനേജ്‌മെന്റും ആവശ്യപ്പെട്ടത്. 2024 വരെ പിക്വേക്ക് ബാഴ്‌സിയിൽ കരാർ ബാക്കിയുണ്ട്. ക്രിസ്റ്റൻസൻ, അറോഹോ, എറിക് ഗർഷ്യ എന്നിവർ ഉള്ളതിനാൽ ഉദ്ദേശിച്ച പ്രകടനം ലഭിക്കാത്ത പക്ഷം പിക്വേയെ ബഞ്ചിലിരുത്താൻ സാവിക്ക് മറിച്ചു ചിന്തിക്കേണ്ടി വരില്ല.

എത്ര സീനിയർ താരം ആണെങ്കിലും താൻ ഉദ്ദേശിക്കുന്ന ഫലം ലഭിച്ചില്ലെങ്കിൽ കർശന നടപടിയെടുക്കാൻ മടിക്കിലെന്ന ശക്തമായ സന്ദേശമാണ് സാവി നൽകാൻ ആഗ്രഹിക്കുന്നതും