മൗറിഞ്ഞോയെ വീഴ്ത്തി ബെനീറ്റസ്, യുണൈറ്റഡിന് തോൽവി

noufal

Download the Fanport app now!
Appstore Badge
Google Play Badge 1

സെന്റ് ജെയിംസ് പാർക്കിൽ മൗറീഞ്ഞോയുടെ യുണൈറ്റഡിന് ബെനീറ്റസിന്റെ ന്യൂ കാസിൽ യൂണൈറ്റഡിന്റെ വക പ്രഹരം. എതിരില്ലാത്ത ഒരു ഗോളിനാണ് ന്യൂ കാസിൽ നിർണായക ജയം സ്വന്തമാക്കിയത്. രണ്ടാം പകുതിയിൽ റിച്ചിയാണ് അവരുടെ ഗോൾ നേടിയത്. കരിയറിൽ ഒരിക്കൽ പോലും സെന്റ് ജെയിംസ് പാർക്കിൽ ജയിച്ചിട്ടില്ലാത്ത മൗറീഞ്ഞോക്ക് തന്റെ റെക്കോർഡ് തിരുത്താൻ ഇനിയും കാത്തിരിക്കേണ്ടി വരും.

ഗോൾ രഹിതമായിരുന്നു ആദ്യ പകുതി. സ്വന്തം മൈതാനത്ത് ന്യൂ കാസിൽ ആദ്യ പകുതിയിൽ യൂണൈറ്റഡിനേക്കാൾ മികച്ചു നിൽക്കുകയും ചെയ്തു. പക്ഷെ മാഞ്ചസ്റ്റർ പ്രതിരോധം മറികടക്കാൻ ബെനീറ്റസിന്റെ ടീമിനായില്ല.

മാറ്റങ്ങൾ ഇല്ലാതെയാണ് രണ്ടാം പകുതിയിൽ ഇരു ടീമുകളും ഇറങ്ങിയത്. സാഞ്ചസിലൂടെ യുണൈറ്റഡ്‌ ലീഡിന് തൊട്ട അടുത്തെത്തിയെങ്കിലും ന്യൂ കാസിലിന്റെ മികച്ച പ്രതിരോധം തുടർന്നപ്പോൾ സന്ദർശകർക്ക് ഗോൾ കണ്ടെത്താനായില്ല. 65 ആം മിനുട്ടിലാണ് ന്യൂ കാസിലിന്റെ ഗോൾ പിറന്നത്. ഫ്രീകിക്കിൽ ബോക്സിലെത്തിയ പന്ത് ഗെയ്ൽ ഹെഡ് ചെയ്തപ്പോൾ ബോക്സിൽ മാർക്ക് ചെയ്യപ്പെടാതെ നിന്ന് റിച്ചി മികച്ച ഫിനിഷിൽ യുണൈറ്റഡ്‌ വലയിലെത്തിച്ചു. തൊട്ടടുത്ത മിനുട്ടിൽ മാറ്റിച്, പോഗ്ബ, ലിംഗാർഡ് എന്നിവരെ പിൻവലിച്ച മൗറീഞ്ഞോ കാരിക്, മക് ടോമിനി, മാറ്റ എന്നിവരെ കളത്തിൽ ഇറക്കി. സമനില നേടാനായി യുണൈറ്റഡ്‌ ഉണർന്ന് കളിച്ചതോടെ ഏതാനും മിനിറ്റുകൾ ന്യൂ കാസിലിന് നന്നായി പ്രതിരോധിക്കേണ്ടി വന്നെങ്കിലും യുണൈറ്റഡ്‌ ആക്രമണത്തെ പിന്നീടുള്ള സമയമത്രയും പിടിച്ചു കെട്ടി ബെനീറ്റസിന്റെ സംഘം അർഹിച്ച ജയം സ്വന്തമാക്കി. ഒക്ടോബറിന് ശേഷം ന്യൂ കാസിൽ നേടുന്ന ആദ്യ ഹോം ജയമാണ് ഇത്.

കൂടുതൽ കായിക വാർത്തകൾക്ക് : www.facebook.com/FanportOfficial