ഉന്മുക്ത് ചന്ദ് പൊട്ടിയ താടിയെല്ലുമായി കളിച്ച് നേടിയ ശതകത്തിന്റെ(116) ബലത്തില്‍ യുപിയെ വീഴ്ത്തി ഡല്‍ഹിയ്ക്ക് വിജയ് ഹസാരെ ട്രോഫിയില്‍ വിജയം. ഇന്ന് നടന്ന മത്സരത്തില്‍ 55 റണ്‍സിന്റെ വിജയമാണ് ഡല്‍ഹി നേടിയത്. ചന്ദിനു പുറമേ ഹിതെന്‍ ദലാല്‍(55), ധ്രുവ് ഷോറെ(31), നിതീഷ് റാണ(31) എന്നിവരുടെ ഇന്നിംഗ്സിന്റെ ബലത്തില്‍ ഡല്‍ഹി 307/6 എന്ന സ്കോറില്‍ എത്തുകയായിരുന്നു. യുപിയ്ക്കായി അങ്കിത് രാജ്പുത്, കാര്‍ത്തിക് ത്യാഗി എന്നിവര്‍ രണ്ട് വീതം വിക്കറ്റ് വീഴ്ത്തി.
മറുപടി ബാറ്റിംഗില്‍ യുപിയ്ക്കായി ഉമംഗ് ശര്‍മ്മ(102) ശതകം നേടിയെങ്കിലും ടീമിനു വിജയത്തിലെത്താനായില്ല. അക്ഷ്ദീപ് നാഥ്(54) റണ്‍സുമായി തിളങ്ങിയെങ്കിലും 45.3 ഓവറില്‍ യുപി 252 റണ്‍സിനു ഓള്‍ഔട്ട് ആയി. ഖുല്‍വന്ത് ഖജ്രോലിയ നാലും പ്രദീപ് സാംഗ്വാന്‍ മൂന്നും വിക്കറ്റാണ് ഡല്‍ഹിയ്ക്കായി നേടിയത്.
കൂടുതൽ കായിക വാർത്തകൾക്ക് : www.facebook.com/FanportOfficial
