ഐപിഎലിലേക്ക് തിരികെ എത്തുന്ന ചെന്നൈ സൂപ്പര്‍ കിംഗ്സ് എന്ത് വില കൊടുത്തും രവിചന്ദ്രന്‍ അശ്വിനെ നിലനിര്‍ത്താന്‍ ശ്രമിക്കുമെന്ന് എംഎസ് ധോണി. 2009 മുതല്‍ സി എസ് കെയുടെ ഭാഗമാവുകയും 2016-17 സീസണുകളില്‍ ധോണിയോടൊപ്പം പൂനെയിലും കളിച്ച താരമാണ് അശ്വിന്‍. തമിഴ്നാട് താരമെന്ന നിലയിലും ചെന്നൈയുടെ പഴയ കോര്‍ ടീമിന്റെ ഭാഗമായതും അശ്വിനു വേണ്ടി ലേല യുദ്ധത്തിനു തങ്ങള്‍ തയ്യാറെന്നാണ് ധോണി നല്‍കുന്ന സൂചന. അശ്വിനു പുറമേ മുന്‍ ചെന്നൈ താരങ്ങളായ ഡ്വെയിന്‍ ബ്രാവോ, ഫാഫ് ഡു പ്ലെസി, ബ്രണ്ടന്‍ മക്കല്ലം എന്നിവരെയും തിരികെ ടീമിലെത്തിക്കാന്‍ ശ്രമിക്കുമെന്ന് ധോണി പറഞ്ഞു.
ഇതൊക്കെയാണെങ്കിലും റൈറ്റ് ടു മാച്ച് കാര്‍ഡ് ഉപയോഗിച്ച് രണ്ട് താരങ്ങളെ മാത്രമേ നിലനിര്‍ത്താനാകൂ എന്നതിനെക്കുറിച്ച് ബോധ്യമുള്ളതിനാല്‍ ദൗത്യം പ്രയാസകരമാകുമെന്നും ധോണി പറഞ്ഞു. ഇവരെല്ലാം തന്നെ ചാമ്പ്യന്‍ താരങ്ങളാണ്. ഏത് ടീമിനും ഇവരെ സ്വന്തമാക്കുവാന്‍ ആഗ്രഹം കാണും. അതിനാല്‍ തന്നെ ശ്രമം പ്രയാസകരമാകുമെന്ന് ധോണി അറിയിച്ചു.
മൂന്ന് ഇന്ത്യന്‍ താരങ്ങളെ നില നിര്‍ത്തിയതിനാല്‍ അശ്വിനെ റൈറ്റ് ടു മാച്ച് ഉപയോഗിച്ച് നിലനിര്‍ത്തുവാന്‍ ചെ്ന്നൈയ്ക്ക് ആകില്ല. അതിനാല്‍ തന്നെ ഉയര്‍ന്ന വില കൊടുത്ത് തന്നെയാവും അശ്വിനെ നിലനിര്‍ത്താന്‍ ചെന്നൈയ്ക്ക് ശ്രമിക്കേണ്ടി വരിക. ഇത് അശ്വിനു ടൂര്‍ണ്ണമെന്റില്‍ ഉയര്‍ന്ന വില ലഭിക്കുവാനും ഇടയാക്കുമെന്നാണ് കരുതപ്പെടുന്നത്.
47 കോടി രൂപയുമായാണ് ചെന്നൈ ലേലത്തിനു എത്തുക. അതിനാല്‍ തന്നെ എല്ലാ താരങ്ങള്‍ക്കും നല്‍കാവുന്ന വിലയെക്കുറിച്ച് ടീമിനു ധാരണയുണ്ട്. അതിനപ്പുറം പോയാല്‍ അവരെ ഉപേക്ഷിക്കുക എന്നത് മാത്രമാവും ടീമിനു മുന്നിലുള്ള വഴി.
കൂടുതൽ കായിക വാർത്തകൾക്ക് : www.facebook.com/FanportOfficial
