ബിഗ് ബാഷിലെ കന്നി കിരീടം സ്വന്തമാക്കി അഡിലെയ്ഡ് സ്ട്രൈക്കേഴ്സ്. ഇന്ന് നടന്ന ഫൈനല്‍ പോരാട്ടത്തില്‍ ഹോബാര്‍ട്ട് ഹറികെയിന്‍സിനെതിരെ 25 റണ്‍സിന്റെ വിജയമാണ് അഡിലെയ്ഡിനെ ചാമ്പ്യന്മാരാക്കിയത്. ആദ്യം ബാറ്റ് ചെയ്ത സ്ട്രൈക്കേഴ്സ് ജേക്ക് വെത്തറാള്‍ഡിന്റെ ശതകത്തിന്റെ ബലത്തില്‍ 20 ഓവറില്‍ 2 വിക്കറ്റ് നഷ്ടത്തില്‍ 202 റണ്‍സ് നേടുകയായിരുന്നു. മറുപടി ബാറ്റിംഗിനിറങ്ങിയ ഹറികെയിന്‍സിനു 5 വിക്കറ്റ് നഷ്ടത്തില്‍ 177 റണ്‍സ് മാത്രമേ നേടാനായുള്ളു.
ഫൈനലില്‍ ടോസ് നേടിയ സ്ട്രൈക്കേഴ്സ് ബാറ്റിംഗ് തിരഞ്ഞെടുക്കുകയായിരുന്നു. 70 പന്തില്‍ 9 ബൗണ്ടറിയും 8 സിക്സും സഹിതം 115 റണ്‍സ് നേടിയ ജേക്ക് വെത്തറാള്‍ഡും29 പന്തില്‍ നിന്ന് 44 റണ്‍സ് നേടി നായകന്‍ ട്രാവിസ് ഹെഡുമാണ് ബാറ്റിംഗ് ടീമിനു വേണ്ടി തിളങ്ങിയത്. ജോഫ്ര ആര്‍ച്ചര്‍, ഡാനിയേല്‍ ക്രിസ്റ്റ്യന്‍ എന്നിവരാണ് ഓരോ വിക്കറ്റ് വീതം ഹോബാര്‍ട്ടിനായി നേടി.
203 റണ്‍സ് ലക്ഷ്യം തേടി ഇറങ്ങിയ ഹോബാര്‍ട്ടിനു വേണ്ടി ഷോര്‍ട്ട് അര്‍ദ്ധ ശതകം നേടിയെങ്കിലും ഇന്നിംഗ്സിനു വേണ്ടത്ര വേഗത നല്‍കാന്‍ താരത്തിനായില്ല. 68 റണ്‍സ് നേടി താരം പുറത്തായി ശേഷം ജോര്‍ജ്ജ് ബെയിലി(46), ഡാനിയേല്‍ ക്രിസ്റ്റ്യന്‍(29*) എന്നിവര്‍ പൊരുതി നോക്കിയെങ്കിലും ലക്ഷ്യത്തിനു 25 റണ്‍സ് അകലെ മാത്രമേ ടീമിനു എത്താനായുള്ളു.
സ്ട്രൈക്കേഴ്സിനു വേണ്ടി പീറ്റര്‍ സിഡില്‍ 3 വിക്കറ്റ് വീഴ്ത്തി. തന്റെ നാലോവറില്‍ വെറും 17 റണ്‍സാണ് സിഡില്‍ വഴങ്ങിയത്. ട്രാവിസ് ഹെഡിനും ഒരു വിക്കറ്റ് ലഭിച്ചു.
കൂടുതൽ കായിക വാർത്തകൾക്ക് : www.facebook.com/FanportOfficial
